حوار: هبة ابراهيم
تعتمد البساطة والوضوح في الظهور، الفاشون بلوجر لمياء البرديسي وجدت من شغفها وحبها للموضة والمكياج طريقا للوصول لآلاف المتابعين فهي تقدم نصائح ومعلومات تهم المرأة المصرية بشكل خاص والعربية بشكل عام بأسلوب يحاكي العقليات الثقافية المختلفة وهذا ما جعل للمياء مكانة مميزة على منصات التواصل الاجتماعي ونحن في دولفينوس التقينا بها لنتعرف اكثر عليها 💬
س: من مهندسة مدنية الى فاشون بلوجر وانفلونسر على وسائل التواصل الاجتماعي، كيف كانت البداية وما الذي ألهمك للقيام بهذا التحول؟
من وانا صغيره بحب مجلات الموضة والتجميل وبالتحديد مجلة لها وكنت بتفرج على برامج بنفس الخصوص بس لما اشتغلت في الهندسة وبدأت اعرف اليوتيوب، لاني لحد ما اتخرجت سنة ٢٠١١ مكنتش اعرفه خالص عرفته سنه ٢٠١٣ كنت بتابع قناة واحدة بس لبنت جزائرية. بدأت أواخر ٢٠١٤ لما خدت القرار بعد ما أصبح عندي معلومات كويسة والاهم عندي موهبه الشرح وتوصيل المعلومة فحبيت استغلها في الخير، وده كان أسرع قرار خدته في حياتي قررت بليل افتح قناة. تاني يوم صورت أول فيديو عشان هدفي افيد البنات واخلي كل بنت تبقى خبيره تجميل نفسها وطبعا مكنتش اعرف ان المجال ده ممكن اكسب منه انا بدات من غير معرفة اي حاجه خالص كل اللي اعرفه معلومات وحابه اوصلها للبنات ومكنتش بمنتج الفيديوهات كانت زي ما بصورها بتنزل واستمريت كده فتره لحد ما بدات اتعلم المونتاج واحسن طريقه التصوير وللان بصور بالموبايل. لما بدأت في القناه كنت في نفس الوقت بشتغل وكنت بعرف أوازن بين الاتنين وبقالي فقط ٣ سنين متفرغه تماما للسوشيال ميديا، لكن لسه مخدتش القرار بالبعد النهائي عن الهندسة.
س: عالم الانترنت مليء بالصعوبات، ما هي التحديات التي واجهتك وكيف تغلبت عليها ؟
التنمر والتعليقات السلبية وكل ده قابلته بالتجاهل وفي بعض الاحيان بالبلوك واشتغلت على نفسي اكتر عشان اطور من نفسي ومن المحتوى والحمد لله وصلت لده.
س: في البداية كنتِ تتعمدِين عدم الظهور في فيديوهات، هل كانت ستنجح القناة لو اعتمدت هذا الأسلوب؟
لا، لأن الظهور فيه تواصل ومصداقية أكبر وده حصل بناء على طلب جمهوري مني وحقيقي ده فرق معايا كتير وكفايه محبتهم اللي بشوفها لما بقابل حد منهم في أي مكان بالصدفة وهذا يأكد لي ان ده احسن قرار خدته.
س: علاقتك انتي ولميس مثال للصداقة بين الاخوة، ماذا يمكنك أن تخبرينا عنها ؟
لميس مش بس اختي دي توأم روحي وصديقتي وفعلا انا حابه ده جدا في علاقتنا وهيا مبتقصرش معايا ابدا بتساعدني في كل حاجه بتصور فيديوهاتي، وصوري وبتيجي معايا في مشاوير شغلي لو عندي تصوير خارجي وبحب استشيرها دايما في كل حاجه حتى شغلي والشراء لأنها صادقة معايا جدا وبأتمنها على كل حاجة و بحبها اوي.
س: اليوم لديك جمهور يتجاوز ال 200 ألف متابع، وهذا يزيد من مسؤولياتك في اختيار المحتوى المقدم، كم يستغرق منك إيجاد فكرة و إعداد فيديو أو صورة جديدة؟
كفكرة مش بياخد وقت كبير بس بدونها في نوت بوك لان بتجيلي افكار كتير غير اني بدون الافكار اللي بيطلبوها مني متابعاتي، لكن كتصوير فيديو بياخد يوم تصوير وتجهيز للمونتاج والتحميل لكن الصور بستغل خروجاتي وبتصور واحيانا بتصور في البيت وبحب جدا صور السيلفي. وقبل ما انزل البوست بياخد ساعه تجهيز اكتب ايه بالضبط اما لو التصوير للفاشون فده بياخد وقت كبير عشان بخطط من قبلها افكار للتنسيقات وبجهز كل حاجه مع لميس طبعاً.
س: ما هي نصيحتك للفتيات الراغبات بأن يصبحن مدونات في مجال الموضة على انستغرام؟
يدونوا ستايلهم الخاص بدون تقليد، أن يكونوا نفسهم و يعرفوا ازاي ينسقوا صح بافكار كتير وألوان حلوه ويكتبوا تفاصيل اللبس ده عشان يساعدوا البنات أكثر ويتصوروا في اماكن حلوة وبجوده عالية مش لازم سيشن خالص، لكن الاهم جوده الصوره عالية.
س: عند التعامل مع العلامات التجارية لترويج منتجاتها، ما هو الشيء الأكثر أهمية بالنسبة لك؟
أن تكون جودتها ممتازة واسلوبهم معايا كويس
س: بعيدا عن الكاميرا، كيف تقضي لمياء يومها المعتاد؟
زي اي بنت طبيعية لو ورايا مشوار بعمله، أساعد ماما في البيت برتب دولابي، بخطط لليوم هعمل فيه ايه سواء بوست او فيديو او ستوري بالاضافة للحاجات الطبيعية زي الصلاة والأكل والشرب و بكلم صحابي اطمن عليهم اقعد مع اهلي واشوف صحابي كل ويك اند.
س: ما هي كتبكِ المفضلة؟
انا بفضل الروايات بحب اعيش معاها واتخيل نفسي جواها وده بيمتعني جدا فمقدرش اقول اسم روايه واحده بس في العموم بحب جدا روايات أحمد مراد لانها اكتر روايات بتشدني وهقول اسم روايتين على سبيل المثال : تراب الماس و موسم صيد الغزلان.
تصنيفات أخرى : انفلونسر يوتيوبر صناع المحتوى
